Benjaminak - Helburuak
Landu behar ditugun helburuak zehazteko
gure haurren ezaugarriak kontuan hartuko ditugu. Oro har, lehen aipatu
ditugun ezaugarriak izango ditugu irizpide helburu nagusiak planteatzeko.
Helburu nagusi hauek mugikariarekiko harremana, esparruarekiko harremana,
beste jokalariekiko harremana, arautegiarekiko harremanak, norberaren
gorputzaren ezagutza eta gaitasun fisikoak eta baloreak landuko dituzte
eta hortaz gain, ahaztu ezin dugun helburu bat planteatuko dugu: ondo
pasatzea. Horrela, benjaminekin planteatuko ditugun helburuak hauexek
izango dira:
Mugikariaren erabilpena eta egokipena:
Esparruan mugitzea:
Jokalarien arteko harremanak:
Arautegiaren oinarrizko ezagupena:
Norberaren gorputza ezagutu eta gaitasun fisikoak hobetu:
Baloreetan hezi:
Ondo pasatzea:
Benjaminekin landuko ditugun edukiak helburuek markatzen dituzte, beraz aldi honetan hurrengo edukiak ikusiko ditugu:
Mugikariaren erabilpena eta egokipena:
Haurrak oraindik ez ditu bere ahalmen motorrak
guztiz garatuak. Horregatik, baloia hartzeko eta kontrolatzeko arazoak
ditu (koordinazioa, indarra eta horrelakoak garatu ahala hobetuz joango
dira). Gainera, adin hauetan baloiari beldurra diote. Helburu hau
lantzeko, familiarizazio jolasak erabiliko ditugu; era guztietako
baloiak erabiliz, hankaz zein eskuz jolastuko dugu... Gogoratu behar
dugu, kategoria honetan hiru talde kiroletan parte hartzen dutela
eta horregatik, era guztietako baloiak erabiltzeko ahalmenak landuko
ditugu.
Esparruan mugitzea:
Haurren portaerak ikusten baditugu, haurra
zelaian edo joko eremuan galduta dabilela ohartuko gara. Normalean,
haurraren erreferentzia baloia da (ez atea ezta beste jokalariak ere)
eta denak baloiaren atzetik mugitzen dira. Pixkanaka landuko dugu
helburu hau eta horretarako orientazio jolasak erabil daitezke (joko
eremua ezagutzeko lasterketak, baloia kenduz eta harrapaketan ibili,
ateak kolore ezberdinez margotu....).
Jokalarien arteko harremanak:
Arestian aipatu dugunez, 8 eta 10 urte
arteko haurrak oso egozentrikoak dira. Hau da, baloia hartu eta beraiek
bakarrik bukatu nahi dute jokaldia; edo, behintzat, bukatzen saiatzen
dira. Gainera, ez dituzte bere taldekideak bilatzen eta jada badakite
beraien taldekideen artean onak eta txarrak ezberdintzen. Gauzak horrela
izanda, gure lana pixkanaka talde lanean sartzea izango da. Baina
lan hau astiro egingo dugu. Hasteko berak bakarrik jolastuko du, gero
taldekide baten laguntzarekin... azkenean egoera errealean parte hartuko
du. Hala ere, pazientzi handiko lana izango da hau. Jolasen arauak
aldatuz posible izango dugu helburu hau lantzea.
Arautegiaren oinarrizko ezagupena:
Ikusi dugun bezala, arauak ulertzeko arazoak
baditu, arautegiari buruz ia ez daki ezer, arraroa egiten zaio zelaiaren
zati bat ezin zapaltzea, eta abar. Astiro-astiro minieskubaloiaren
arauak ikusiko ditugu; batez ere, oinarrizko arauak. Hau da, boteak,
bikoitzak, areak, eta atezaina eta jokalaria ezberdintzen. Aipatu
dugunez arauak ulertzeko arazoak izango dituzte, beraz, praktikatzen
ditugun jolasek oso arau sinpleak izango dituzte (hobe da joko baten
aldaera beste joko bat izango balitz bezala azaltzea; bestela haurra
nahastu egingo da eta jolasean zuen interesa galduko du).
Norberaren gorputza ezagutu eta gaitasun fisikoak hobetu:
Adin honetan haurrak beraien gorputzaren
gaitasunak hautematen hasten dira, bai indarra, abiadura, erresistentzia,
oreka, koordinazioa, lateralitatea etab.... Horregatik aspektu guzti
hauek hoberen landu ditzaten ahalik eta ariketa eta jarduera mota
anitzenak proposatu behar dira.
Baloreetan hezi:
Kirolak egoera aproposak sortzen ditu balore
ezberdinak lantzeko. Aspektu honetan begiralearen lana oso handia
da, berak eman beharko baitizkie argibideak haurrei. Kirolarekin landu
daitezkeen balore aipagarrienak hauek dira: Errespetua, tolerantzia,
elkartasuna, ekidetza, berdintasuna,bakea, natura zaintzea...
Ondo pasatzea:
Ezin dugu ahaztu haurrak eskola kirolean
ondo pasatzeko ematen duela izena. Beraz, gure helburuetako bat entrenamendu
saio atseginak burutzea izango da. Gainera, dibertitzen garenean askoz
gehiago eta gusturago ikasten dugula kontuan hartu behar dugu. Hortaz
gain, haurrak hurrengo urteetan eskola kirolean parte hartzea interesatzen
zaigu (lana aldika egiten baita eta jarraipena behar da) eta horretarako
ezinbestekoa da haurrak ondo pasatzea entrenamendu saioetan.
Benjaminekin landuko ditugun edukiak helburuek markatzen dituzte, beraz aldi honetan hurrengo edukiak ikusiko ditugu:
- Baloi harrerak
- Baloi kolpeoak
- Baloi kontrolak
- Baloi gidapenak.
- Jaurtiketak
- Mugimenduak (oinarrizko mugimenduak)
- Gure eta aurkariaren atea ezberdintzen
- Paseak
- Besteen kokapenak
- Jokoaren helburu orokorra
- Debekatutako zonak, gola sartzea...
- Minieskubaloiaren arautegia
© 2008 Kirol Zerbitzua | Legezko Oharra
